پاکستان نے بلائنڈ ٹی ٹوئنٹی ورلڈ کپ کا تاج اپنے نام کر لیا!

پاکستانی بلائنڈ قومی کرکٹ ٹیم نے شاندار کارکردگی کا مظاہرہ کرتے ہوئے فائنل میں بنگلادیش کو 10 وکٹوں سے شکست دے دی۔ بنگلادیش نے ٹاس جیت کر پہلے بیٹنگ کا فیصلہ کیا اور 7 وکٹوں کے نقصان پر 139 رنز بنائے۔ عارف حسین نے 54 رنز کی نمایاں اننگز کھیلی، لیکن پاکستانی باؤلرز نے بہترین باؤلنگ کرتے ہوئے ہدف کو محدود رکھا۔ بابر علی نے 2 وکٹیں حاصل کیں، جبکہ محمد سلمان اور مطیع اللہ نے ایک ایک کھلاڑی کو آؤٹ کیا۔

پاکستانی بلائنڈ ٹیم نے ہدف کا تعاقب انتہائی اعتماد کے ساتھ کیا اور 11ویں اوور میں 140 رنز بنا کر فتح حاصل کی۔ نثار علی نے شاندار 72 رنز کی ناقابل شکست اننگز کھیلی، جبکہ محمد صفدر نے 47 رنز کے ساتھ ان کا بھرپور ساتھ دیا۔

فائنل سے قبل پاکستان نے سیمی فائنل میں نیپال کو یکطرفہ مقابلے میں 10 وکٹوں سے شکست دی تھی۔ 95 رنز کا ہدف قومی ٹیم نے صرف چھٹے اوور میں حاصل کر لیا تھا۔ کامران اختر 63 اور بابر علی 32 رنز کے ساتھ نمایاں رہے۔ دوسری جانب، بنگلادیش نے سنسنی خیز مقابلے میں سری لنکا کو شکست دے کر فائنل میں جگہ بنائی تھی۔

پاکستان کی شاندار جیت نہ صرف کھلاڑیوں کی محنت کا نتیجہ ہے بلکہ اس سے یہ بھی ثابت ہوتا ہے کہ بلائنڈ کرکٹ میں قومی ٹیم کا کوئی ثانی نہیں۔ پاکستان نے ایک بار پھر اپنے عزم اور مہارت سے دنیا بھر میں اپنا لوہا منوا لیا۔

مزیدخبروں کے لیے ہماری ویب سائٹ ہم مارخور وزٹ کریں۔