USD
SAR
AED
CAD
AUD
GBPدبئی انٹرنیشنل کرکٹ اسٹیڈیم میں کھیلے گئے اس دلچسپ میچ میں پاکستان کی انڈر 19 ٹیم ( Pakistan under19) نے بھارت کو 43 رنز سے شکست دے کر ایشیا کپ میں فاتحانہ آغاز کیا۔
پاکستان نے پہلے بیٹنگ کرتے ہوئے مقررہ 50 اوورز میں 281 رنز 7 وکٹوں کے نقصان پر بنائے۔ شاہزیب خان کی شاندار بیٹنگ نے پاکستان کی جیت کی راہ ہموار کی، جنہوں نے 159 رنز کی اننگز کھیلی، جس میں 10 چھکے اور 5 چوکے شامل تھے۔
عثمان خان نے 60 رنز کی اہم اننگز کھیلی اور دوسرے ٹاپ اسکورر رہے، جبکہ محمد ریاض اللہ نے 27 رنز بنائے۔ دیگر کھلاڑیوں میں سے کوئی بھی دہرے ہندسے میں داخل نہ ہو سکا۔
بھارت کی طرف سے سمرتھ ناگاراج نے 3 وکٹیں حاصل کیں، جبکہ ایوش ماہترے نے 2 وکٹیں لیں، اور یودھاجت گوا اور کرن چورملے نے ایک ایک وکٹ حاصل کی۔
بھارتی ٹیم کی بیٹنگ پاکستان کے بولرز کے سامنے نہ ٹک سکی، اور ان کے بیٹرز نے دباؤ کا سامنا کیا۔ نکھل کمار 67 رنز کے ساتھ بھارت کے سب سے بڑے اسکورر رہے، جبکہ ہرونش پنگالیا نے 26 رنز بنائے۔ ایوش ماہترے اور کرن چورملے نے بالترتیب 20 رنز بنائے۔
اختتامی لمحات میں محمد احسان نے جارحانہ بیٹنگ کا مظاہرہ کرتے ہوئے 30 رنز بنائے، لیکن وہ رن آؤٹ ہو گئے، اور اس کے ساتھ ہی بھارت کی پوری ٹیم 48ویں اوور میں 238 رنز پر آل آؤٹ ہو گئی۔
پاکستان کی طرف سے علی رضا نے 3 وکٹیں لیں، عبدالسبحان اور فہام الحق نے 2، 2 وکٹیں حاصل کیں، جبکہ نوید احمد اور عثمان خان نے ایک ایک وکٹ حاصل کی۔
پاکستان کی انڈر 19 ٹیم ( Pakistan under19) کا اگلا میچ 2 دسمبر کو میزبان یو اے ای کے خلاف ہوگا۔