مریم نواز کا ڈی جی خان میں اسکول نیوٹریشن پروگرام کا افتتاح، بچوں کے لیے مفت دودھ کا اعلان

ڈی جی خان میں اسکول نیوٹریشن پروگرام کی افتتاحی تقریب کے دوران وزیر اعلیٰ پنجاب مریم نواز نے کہا کہ لاہور سے ڈی جی خان کتنی بھی دور ہو، میں یہاں کے بچوں سے دور نہیں ہوں۔ انہوں نے کہا کہ وہ بچوں کے لیے ویسے ہی فکر مند ہیں جیسے ایک ماں اپنے بچوں کے لیے ہوتی ہے، اور ان بچوں کو وی آئی پی سمجھتی ہیں۔

مریم نواز نے اس بات کا اظہار کیا کہ انہیں لگا تھا کہ ڈی جی خان کے بچے انہیں نہیں جانتے، مگر بچوں کی محبت نے انہیں حیران کن حد تک خوش کر دیا ہے۔ انہوں نے اعلان کیا کہ ڈیرہ غازی خان سے اسکول نیوٹریشن پروگرام کا آغاز کیا جا رہا ہے، اور پانچویں کلاس تک کے بچوں کے لیے مفت دودھ فراہم کیا جائے گا۔

وزیر اعلیٰ پنجاب نے مزید کہا کہ پنجاب میں ہزاروں اسکول ہیں اور لاکھوں بچے تعلیم حاصل کر رہے ہیں۔ انہوں نے تسلیم کیا کہ پاکستان ایک امیر ملک نہیں ہے اور وسائل محدود ہیں، لیکن وعدہ کیا کہ بچوں کی غذائی ضروریات پوری کرنے کے لیے تمام ممکنہ کوششیں کی جائیں گی۔

انہوں نے کہا کہ بہت سے لوگ باتیں کرتے ہیں لیکن عملی اقدامات کم ہی نظر آتے ہیں۔ ان کی خواہش ہے کہ وہ عملی طور پر کچھ کر کے دکھائیں تاکہ عوام کو محسوس ہو کہ ان کی وزیر اعلیٰ ایک ماں کی طرح ہے۔ یہ پروگرام ڈیرہ غازی خان اور مظفر گڑھ سے شروع کیا جا رہا ہے۔

مریم نواز نے کہا کہ وزارت تعلیم کی ٹیم دن رات بچوں کی بہتری کے لیے کام کر رہی ہے۔ انہوں نے کہا کہ قوم کا پیسہ عوام کا پیسہ ہے اور ایک روپے کی بھی خیانت برداشت نہیں کی جائے گی۔ ان کا مقصد ہے کہ عوام کا پیسہ بغیر کسی بدعنوانی کے ان تک پہنچے۔

انہوں نے وزیر تعلیم رانا سکندر حیات کی کوششوں کا ذکر کرتے ہوئے کہا کہ وہ بچوں کے لیے دل سے کام کر رہے ہیں، اور وہ کوشش کر رہے ہیں کہ سرکاری اسکولوں کی سہولتیں پرائیویٹ اسکولوں کے بچوں سے کم نہ ہوں۔ ان کی خواہش ہے کہ اسکولوں میں تعلیم، عمارت، ماحول اور اساتذہ کی بہترین سہولتیں فراہم کی جائیں۔

مریم نواز نے کہا کہ بچوں کو مفت دودھ فراہم کرنا وزیر تعلیم کی ذمہ داری ہے، اور اس پروگرام کو اگلے پانچ سالوں تک جاری رکھنا صوبائی وزیر تعلیم کی ذمہ داری ہے۔ انہوں نے یہ بھی کہا کہ ایسے پروگرام پاکستان بھر میں شروع ہونے چاہیے اور دیگر صوبوں کے وزرائے اعلیٰ کو بھی ایسے اقدامات کرنا چاہیے۔

انہوں نے مزید کہا کہ پنجاب واحد صوبہ ہے جہاں نواز شریف کے ویژن کی بدولت مہنگائی میں کمی آئی ہے۔ آٹے، روٹی اور سبزیوں کی قیمتیں کم ہوئی ہیں اور مہنگائی 35 فیصد سے کم ہو کر سنگل ڈیجٹ پر آگئی ہے۔

آخر میں، وزیر اعلیٰ نے بچوں کو وطن کی محبت کرنے کی نصیحت کی اور کہا کہ دنیا چاہے جو بھی کرے، بچوں کو اپنے وطن کی سلامتی اور محبت کے لیے کام کرنا چاہیے۔

مزیدخبروں کے لیے ہماری ویب سائٹ ہم مارخور وزٹ کریں۔