پاکستان اور سعودی عرب کے 56 کروڑ ڈالر کے 7 معاہدے، تاریخی تعلقات کی نئی بلندی!

پاکستان اور سعودی عرب کے مابین سرمایہ کاری اور تعاون (Investment and cooperation) کے شعبوں میں اہم پیشرفت ہوئی ہے، جس کے تحت 56 کروڑ ڈالر مالیت کے 7 معاہدوں کو حتمی شکل دی گئی۔ قلیل مدت میں دونوں ممالک کے درمیان 34 مفاہمتی یادداشتوں پر دستخط کیے گئے تھے، جن میں سے یہ 7 معاہدے ایک اہم سنگ میل قرار دیے جا رہے ہیں۔

وزیراعظم آفس کے جاری کردہ بیان کے مطابق، وزیراعظم شہباز شریف کی زیر صدارت اجلاس میں پاکستان اور سعودی عرب کے مابین جاری مختلف منصوبوں اور سرمایہ کاری کی پیشرفت کا جائزہ لیا گیا۔ اجلاس میں خصوصی طور پر سعودی عرب کے ساتھ جوائنٹ ٹاسک فورس کے دوسرے اجلاس میں حاصل کردہ کامیابیوں پر روشنی ڈالی گئی۔

سرمایہ کاری اور معاہدے:
اجلاس میں بتایا گیا کہ سعودی عرب کے ساتھ 56 کروڑ ڈالر کی سرمایہ کاری کے 7 معاہدے طے پا چکے ہیں، جو کہ توانائی، زراعت، انفراسٹرکچر، اور دیگر کلیدی شعبوں میں ہوں گے۔ وزیراعظم نے سعودی عرب کے تعاون کو پاکستان کی معیشت کے لیے اہم قرار دیا اور امید ظاہر کی کہ یہ شراکت داری دونوں ممالک کے لیے مزید ترقی کا ذریعہ بنے گی۔

مزید یہ کہ ذرائع کے مطابق وزیراعظم شہباز شریف کل سے سعودی عرب کا دو روزہ دورہ کریں گے۔ وہ سعودی واٹر سمٹ اور کاپ 16 کے سائیڈ لائن ایونٹس میں شرکت کریں گے۔ ان کے ہمراہ اہم حکومتی وزراء اور مشیر، جن میں وفاقی وزیر اطلاعات عطا تارڑ، وزیر پٹرولیم ڈاکٹر مصدق ملک، اور طارق فاطمی شامل ہیں، بھی سعودی عرب جائیں گے۔

وزیراعظم شہباز شریف نے کہا کہ سعودی عرب ہمیشہ سے پاکستان کا دیرینہ اور مخلص دوست رہا ہے۔ انہوں نے برادر ملک کے ساتھ موجودہ تعاون کو مزید وسعت دینے کی خواہش کا اظہار کیا اور دونوں ممالک کے درمیان سرمایہ کاری ( Investment ) کو مزید فروغ دینے پر زور دیا۔

مزیدخبروں کے لیے ہماری ویب سائٹ ہم مارخور وزٹ کریں۔