جماعتِ اسلامی کا سندھ اسمبلی پر دھرنا آج بھی جاری

جماعتِ اسلامی کی جانب سے گزشتہ روز کراچی میں سندھ اسمبلی کے باہر نئے بلدیاتی نظام کے خلاف دیا جانے والا دھرنا آج بھی جاری ہے۔

جماعتِ اسلامی کا احتجاجی کیمپ سندھ اسمبلی کے گیٹ کے سامنے مین روڈ پر لگا ہوا ہے جس میں شرکاء موجود ہیں۔

امیرِ جماعتِ اسلامی کراچی حافظ نعیم الرحمٰن نے رات گئے دھرنے کے شرکاء سے خطاب کرتے ہوئے کہا کہ سندھ اسمبلی میں اپوزیشن جماعتوں نے بھی کراچی کے لیے کچھ نہیں کیا۔
ان کا کہنا تھا کہ ہماری تحریک سندھ کے ہر شہری کے حق کے لیے ہے، نئے بلدیاتی قانون میں سندھ کے ہر شہر کا میئر بے اختیار کر دیا گیا ہے۔

حافظ نعیم الرحمٰن نے کہا کہ دھرنا عوامی حقوق کے لیے ہے، سندھ حکومت نے تمام ادارے تباہ کر دیئے، اپوزیشن کو ڈرائنگ روم کی سیاست سے باہر نکلنا ہوگا۔

امیرِ جماعتِ اسلامی کراچی کا یہ بھی کہنا تھا کہ ایم کیو ایم کے دور میں کراچی میں ٹرانسپورٹ کا نظام ختم ہوا۔