بھارتی فوجی ہیلی کاپٹر تباہ، چیف آف ڈیفنس اسٹاف جنرل بپن راوت ہلاک

دہلی: بھارتی ریاست تامل ناڈو میں آرمی ہیلی کاپٹر گرکر تباہ ہوگیا، حادثے میں بھارتی چیف آف ڈیفنس اسٹاف بپن راوت سمیت 13 افراد ہلاک ہوگئے ہیلی کاپٹر میں 14 افراد سوار تھے۔

بھارتی میڈیا کے مطابق ابتدائی طور پر جائے حادثہ سے 4 افراد کی لاشیں جبکہ تین شدید زخمیوں کو اسپتال منتقل کیا گیا، وزیراعظم مودی نے حادثے کی تفصیلات طلب کرلیں۔ ملکی ایئرفورس نے تصدیق کی ہے کہ ہیلی کاپٹر میں بھارتی چیف آف ڈیفنس اسٹاف بپن راوت سمیت 14 افراد سوار تھے جن میں بپن راوت کا خاندان اور ان کا عملہ بھی شامل ہے۔

میڈیا رپورٹ میں بتایا گیا کہ بپن راوت میڈیکل کالج میں لیکچر کے لیے جارہے تھے، بپن راوت کی اہلیہ بھی ہیلی کاپٹر میں سوار تھیں، ہیلی کاپٹر میں اعلیٰ دفاعی افسران کی موجودگی کی بھی اطلاعات ہیں۔

بھارتی فضائیہ نے ہیلی کاپٹر حادثے کی تحقیقات شروع کردیں۔ بھارتی ائیرفورس کے مطابق ہیلی کاپٹر حادثے میں مرنے والوں میں بپن راوت اور ان کی اہلیہ بھی شامل ہیں ۔

جائےحادثہ سے13افرادکی لاشیں اسپتال منتقل کردی گئیں مذکورہ لاشیں بری طرح جل چکی ہیں جن کی شناخت کرنا ناممکن ہوگیا، زخمی ہونے والے ایک شخص کو اسپتال میں طبی امداد دی جارہی ہے۔ حادثے میں ہلاک ہونے والوں کی شناخت ڈی این اے ٹیسٹ کے ذریعے کی جائے گی۔ ہیلی کاپٹرمیں بریگیڈئیر، لیفٹیننٹ کرنل سمیت 5سیکیورٹی افسران بھی سوار تھے۔

بھارتی ریاست تامل ناڈو میں گر کر تباہ ہونے والا ملٹری ہیلی کاپٹر، ایم آئی 17 وی 5 روسی ساختہ 2 انجن والا ہیلی کاپٹر ہے۔

بھارتی میڈیا کے مطابق تامل ناڈو کے ہل اسٹیشن کونور کے جنگل میں گر کر تباہ ہونے والا ایم آئی 17 وی 5 ہیلی کاپٹر بلند مقام پر آپریشنز کے لیے استعمال کیا جاتا ہے، ایم آئی 17 وی 5 ہیلی کاپٹر کسی بھی موسم میں استعمال کیا جا سکتا ہے۔

بھارتی میڈیا کے مطابق بھارت نے ایم آئی 17 وی 5 ہیلی کاپٹر کی بڑی کھیپ 2013ء سے 2018ء کے درمیان خریدی تھی۔

بھارتی ماہرین کے مطابق ایم آئی 17 وی 5 ہیلی کاپٹر قابل بھروسہ، محفوظ، اور بڑا ہیلی کاپٹر ہے، ایم آئی 17 وی 5 ہیلی کاپٹرز صدر، وزیراعظم سمیت وی آئی پیز کے لیے استعمال کیا جاتا رہا ہے۔