نادرا کی زبردست سہولت متعارف کرادی گئی

نیشنل ڈیٹا بیس اینڈ رجسٹریشن اتھارٹی (NADRA) نے شہریوں کی سہولت کے لیے اہم قدم اٹھاتے ہوئے سینٹرلائزڈ کمپلینٹ منیجمنٹ سسٹم (
Centralized Complaint Management System) کا آغاز کردیا۔

نادرا نے شکایات کے ازالے کے عمل کو باسہولت اور مزید مؤثر بنانے کے لیے نئے ڈیزائن شدہ نادرا سینٹرلائزڈ کمپلینٹ مینجمنٹ سسٹم کا افتتاح کر دیا۔

نادرا کی جانب سے عوام کو وسیع پیمانے پر خدمات کی فراہمی اور اس سے متعلق شکایات کا اندراج مختلف پلیٹ فارمز پر کیا جا رہا تھا جیسا کہ سوشل میڈیا پر ٹویٹر اور فیس بک جب کہ ہیلپ لائن، پاکستان سٹیزن پورٹل، تحریری درخواستیں، شکایات کا پرانا نظام، کمپلینٹ مینجمنٹ سسٹم اور عوام کے بذات خود نادرا دفاتر اور ہیڈ کوارٹر میں آنا شامل تھا۔

مختلف پلیٹ فارمز ہونے کی وجہ سے نادرا انتظامیہ کے لیے ان کو حل کرنے میں بہت سے مسائل پیدا ہو رہے تھے اور شکایات کے ازالے کے لیے منتشر نظام، شکایات کے حل میں تاخیر اور غیر مؤثر نتائج کا بھی سبب بنا۔

تاہم اب نیا نظام ملک بھر اور بیرون ملک نادرا کی خدمات حاصل کرنے والے عام لوگوں کے مسائل اور شکایات کا فوری اور مؤثر جواب دینے کے عمل کو یقینی بنائے گا۔

اسے کمپلینٹ مینجمنٹ پورٹل نادرا کی ویب سائٹ پر لائیو کر دیا گیا ہے جہاں شہری نادرا سے متعلق کسی بھی مسئلے کے حوالے سے اپنی شکایات براہ راست درج کر سکتے ہیں۔

چیئرمین نادرا طارق ملک نے کہا ہے کہ نادرا کی خدمات اور ملازمین کی کارکردگی کو عوام کے لیے کھول دیا ہے تاکہ وہ خود اس کو پرکھیں اور اپنی رائے دے سکیں۔

چیئرمین نادرا نے کہا نادرا کو عوام کی آنکھ سے دیکھ کر ہی ایک واحد مرکزی نظام تیار کیا ہے۔

چیئرمین نادرا طارق ملک نے کہا نادرا قومی سطح پر عوامی مسائل کی شنوائی کرنے والا سب سے بڑا ادارہ ہے، جو اپنے 755 رجسٹریشن مراکز، 263 موبائل رجسٹریشن وینز اور 10 سمندر پار مراکز میں روزانہ اوسطاً ایک لاکھ لوگوں کو اپنی خدمات فراہم کر رہا ہے،

انہوں نے کہا کہ نادرا کی آن لائن پاک آئی ڈی سروسز کی دستیابی بھی عالمی سطح پر 190 سے زائد ممالک میں ممکن بنائی گئی ہیں۔

چیئرمین نادرا نے کہا نئے نظام کے تحت اگر کسی شکایت کو مقررہ وقت کے اندر اندر حل نہیں کیا جاتا تو ایسی شکایت کو ترجیحاً اعلیٰ سطح پر پہچانے کا فیچر بھی متعارف کرایا گیا ہے جس کی بدولت شکایت براہ راست چیئرمین نادرا تک پہنچے گی۔

انہوں نے کہا شہری نادرا ہیلپ لائن 1777، لینڈ لائن صارفین اور بین الاقوامی کال کرنے والوں کے لیے 051111786100، ای میل، سوشل میڈیا، کسٹمر سروس ڈیپارٹمنٹ اور زونل ڈائریکٹر جنرلز کو ٹویٹر اور فیس بک پر شکایات درج کرا سکتے ہیں۔