مائیک ٹائیسن جلد ہی پہلی بولی وڈ فلم لگر میں نظر آئیں گے

ممبئی (شوبز ڈیسک)سابق امریکی ہیوی ویٹ چیمپیئن باکسر و ریسلر مائیک ٹائیسن جلد ہی پہلی بولی وڈ فلم میں بھارتی ہیرو کو باکسنگ کا مزہ چکھاتے دکھائی دیں گے۔بھارتی فلم ساز کرن جوہر کی پروڈکشن ’دھرما‘ کی جانب سے کی گئی ٹوئٹ میں مائیک ٹائیسن کی مکا مارنے کی تصویر شیئر کرتے ہوئے تصدیق کی گئی کہ امریکی باکسر بھی آنے والی فلم ’لگر‘ کا حصہ ہیں۔پروڈکشن ہاؤس کی جانب سے باکسر کی فلم کی پہلی جھلک انسٹاگرام پر بھی شیئر کی گئی، جس میں مائیک ٹائیسن کو جارحانہ انداز میں مکا مارتے دکھایا گیا ہے۔اسی پوسٹر کو خود امریکی باکسر نے بھی اپنے سوشل میڈیا اکاؤنٹس پر شیئر کیا اور بھارتی فلم کا حصہ بننے پر خوشی کا اظہار کیا۔ فلم ’لگر‘ میں وجے دیوراکونڈا مرکزی کردار میں دکھائی دیں گے۔مذکورہ فلم میں بولی وڈ اداکارہ اننیا پانڈے بھی شامل ہیں اور امکان ہے کہ فلم کو بیک وقت تامل، تیلگو اور ہندی زبان میں ریلیز کیا جائے گا۔’لگر‘ کی کہانی باکسنگ، ریسلنگ اور آرٹ مارشل کے گرد گھومتی ہے، جس میں ممکنہ طور پر مائیک ٹائیسن اور وجے دیوراکونڈا کی فائیٹ دکھائی جائے گی۔’لگر‘ کی ہدایات پوری جگناتھ دیں گے۔خیال کیا جا رہا ہے کہ فلم میں مائیک ٹائیسن کا وجے دیوراکنڈا سے باکسنگ مقابلہ کروایا جائے گا مگر اس حوالے سے فلم کی ٹیم نے کوئی وضاحت جاری نہیں کی۔ابھی واضح نہیں ہے کہ ’لگر‘ کو کب تک ریلیز کیا جائے گا، تاہم امکان ہے کہ اسے آئندہ برس وسط تک جاری کیا جائے گا۔