تاجر،صنعتکار خواتین اور خصوصی افراد کو نو کریاں دیں،عارف علوی حکومت نے کامیاب جوان پروگرام کے تحت 100 ارب روپے مختص کیے،صدر کا سیالکوٹ چیمبر سے گفتگو

راولپنڈی(نمائندہ خصوصی) صدر مملکت ڈاکٹر عارف علوی نے تاجروں اور صنعتکاروں پر زور دیا ہے کہ وہ خواتین اور خصوصی افراد کو مالی شمولیت اور بااختیار بنانے کیلئے اپنے اداروں میں نوکریاں دیں، خصوصی افراد ملک کی آبادی کا 12 سے 14 فیصد حصہ ہیں ،خصوصی افراد کو کاروباری برادری کے تعاون سے ہنر مند بنا کر ملازمتوں کی فراہمی اور مالی طور پر مستحکم کرنے کی ضرورت ہے، ان خیالات کا اظہار انہوں نے ایوان صدر میںسیالکوٹ چیمبر آف کامرس اینڈ انڈسٹری کے صدر قیصر اقبال بریار کی قیادت میں وفد سے ملاقات کے دوران کیا۔

وفد نے صدر مملکت کو سیالکوٹ چیمبر کی برآمدی صلاحیت ، ملکی سماجی و اقتصادی ترقی میں کردار بارے بریفنگ دی،قیصر اقبال بریار نے صدر مملکت کو سیالکوٹ کی تاجر برادری کو درپیش بعض مسائل سے آگاہ کیا۔ صدر ڈاکٹر عارف علوی نے ایس سی سی آئی کو درپیش مسائل کے حل میں مدد کی یقین دہانی کرائی ۔صدر مملکت عارف علوی نے کہا کہ حکومت نوجوانوں ، خواتین اور خصوصی افراد کو بااختیار بنانے ، مالی شمولیت پر توجہ دے رہی ہے ، حکومت نے اپنے کاروبار کیلئے کامیاب جوان پروگرام کے تحت 100 ارب روپے مختص کیے ، صدر مملکت نے کہا ہے کہ آگاہی کے فقدان کی وجہ سے لوگ حکومتی قرضوں سے بھرپور فائدہ نہیں اٹھا سکتے –

نوجوانوں ، خواتین اور خصوصی افرادکو قرضوں کے حصول میں سہولت اور رہنمائی فراہم کرنے کی ضرورت ہے۔ بعد ازاں صدر عارف علوی سے راولپنڈی ، اسلام آباد اور اٹک چیمبرز آف کامرس اینڈ انڈسٹریز کی خواتین نمائندوں پر مشتمل وفد نے بھی ملاقات کی۔ملاقات میں اکتوبر میں چھاتی کے کینسر کے بارے میں لوگوں میں شعور بیدار کرنے کے اقدامات پر تبادلہ خیال کیا گیا۔وفد نے چھاتی کے کینسر کی آگاہی مہم میں اپنے تعاون کی پیشکش کی۔ صدرر مملکت کو یقین دہانی کرائی کہ وفد این جی اوز ، خواتین یونیورسٹیوں اور کالجوں اور دیگر متعلقہ اداروں کے تعاون سے آگاہی پیدا کرنے میں اپنا کردار ادا کرے گا۔